ek hi waqt mein bimar bhi hain thik bhi hain
ye jo hum dur bhi hain aap ke nazdik bhi hain

husn chehre se chhalakta hai siyahi dil se
hae ye log jo raushan bhi hain tarik bhi hain

pankhudi dekhte hi 'mir' ko deta hun dad
hont rangin bhi hain nazuk bhi hain barik bhi hain

shane se shana milaun ki bachaun pahlu
dost eazaz bhi hain bais-e-tazhik bhi hain

in fazaon mein sabhi rang hamin se hain ki hum
ahl-e-iman bhi hain sahib-e-tashkik bhi hain

kuchh samajh mein nahin aata ki mere shahr ke log
wajh-e-tazhik bhi hain laeq-e-tabrik bhi hain