ek husn ki zinat ke liye sham-o-sahar do
aaine tumhaare hain ye khurshid-o-qamar do

wo dil mein samae meri aankhon mein utar kar
ghar ek azal se hai magar rahguzar do

manzil hai meri kaba-o-but-khana se aage
hain naqsh-e-qadam ye bhi sar-e-rahguzar do

hain yun to bahut husn-o-mohabbat ke alawa
hangama-e-takhliq mein naghme hain magar do

aapas mein na than jae 'salam' un ki jhalak se
maqsud-e-nazar ek hai aur dida-e-tar do