ek mahakte gulab jaisa hai
khub-surat se khwab jaisa hai

main use padhti hun mohabbat se
us ka chehra kitab jaisa hai

be-yaqini hi be-yaqini hai
har samundar sarab jaisa hai

main bhatakti hun kyun andheron mein
wo agar aaftab jaisa hai

dubti jae zist ki naw
hijr lamha chanab jaisa hai

main haqaeq bayan kar dungi
ye gunah bhi sawab jaisa hai

chain milta hai us se mil ke magar
chain bhi iztirab jaisa hai

ab 'shabana' mere liye wo shakhs
ek bhule nisab jaisa hai