ek pari ka phir mujhe shaida kiya
ishq ne phir mufsida barpa kiya

aaj phir us shokh ne fuqara kiya
wada-e-imroz bhi farda kiya

khun-e-nahaq ek musalman ka kiya
kya ghazab o shokh-e-be-parwa kiya

dil ko mail shoala-ruon ka kiya
din-e-zardashti ko phir ahya kiya

abr akasr us baras barsa kiya
kya tatabbo dida-e-tar ka kiya

kyun ajal kya tujh ko bhi maut aa gai
is qadar aane mein kyun arsa kiya

kan ki bijli jo yaad aai teri
barq ke manind main tadpa kiya

wo kaf-e-pa-e-hinai kar ke yaad
hijr ki shab ediyan ragda kiya

us ko bhi sakta hua dekh aaina
der tak hairat se munh dekha kiya

khak chhani muddaton tinke chune
kya kahun is ishq mein kya kya kiya

kal na paoge hamein kahiyo safir
aaj aane mein agar hila kiya

wan hue missi se lab un ke kabud
pit kar munh hum ne yan nila kiya

tab uthe hain un buton ke hum se naz
jab kaleja apna patthar ka kiya

hai girah mu-e-kamar ki naf-e-yar
fikr ne apne ye uqda wa kiya

lag paida kar ke ab jallad se
jaan khoi hae dil ne kya kiya

dand pe bandha hum ne joshan ki tarah
harz-e-jaan qatil tera chhalla kiya

mujh ko majnun kar diya manind-e-qais
sehr kuchh aur ghairat-e-laila kiya

marke mein ishq ke sarka na panw
aabru ko jaan ko sadqa kiya

soz-e-furqat ne shararat mujh se ki
haizam-e-tar ki tarah sulga kiya

ai shab-e-furqat na kar mujh par azab
main ne tera munh nahin kala kiya

zulf-e-jaanan jis ne dekhi ek bar
dil se apne umr bhar uljha kiya

is musibat se shab-e-furqat kati
panw pite aah ki nala kiya

ishq afshan-e-jabin-e-yar mein
khak chhalni ki tarah chhana kiya

tha munasib tark-e-ishq-e-yar 'rind'
aap ne ansab kiya aula kiya