ek roz ye sar-rishta-e-idrak jala dun
ai ishq teri wahshat-e-saffak jala dun

ho bas mein jo mere to tera nam bhi mit jae
main kar ke tujhe khak teri khak jala dun

sine mein ulajhti hai rag-e-dil se rag-e-dil
ai ishq hawa de khas-e-namnak jala dun

tasir mein kam ho to karun sher ko bhi aaq
aatish mein jo kam ho wo rag-e-tak jala dun

nazzara koi yun bhi na mahram ho ki 'kashif'
aankhon ko sar-e-jalwa-e-bebak jala dun