fasil-e-sabr mein rauzan banana chahti hai
sipah-e-taish mere dil ko dhana chahti hai

lipat lipat ke shajar ko lubhana chahti hai
har ek bel mohabbat jatana chahti hai

riyal-e-khwab lutati hai donon hathon se
amir-e-shauq mujhe aazmana chahti hai

mera hi sina kushada hai chahaton ke tain
tufang-e-dard mera hi nishana chahti hai

main apne aap ko bhi dekhne se qasir hun
ye sham-e-hijr mujhe kya dikhana chahti hai

khula ki sahil-e-dariya pe main pahunch hi gaya
to ye ana mujhe sahra mein lana chahti hai

numu ko rok qalam ko lagam de 'arshad'
ki ye ghazal tere parde uthana chahti hai