fasl-e-gul mein meri wahshat ke hain saman kitne
purze-purze nazar aate hain gareban kitne

kya kahun dard-e-mohabbat ke hain ehsan kitne
aaj tum ho gae nazdik-e-rag-e-jaan kitne

aaj hanste hue wo rukh se ulatte hain naqab
aaj khatre mein nazar aate hain iman kitne

ek nasheman ke liye phunk gaya sara mahaul
nigah-e-barq ke gulshan pe hain ehsan kitne

hum gunahgar-e-gulistan hain hamein kya malum
lut gae ain bahaaron mein gulistan kitne

khanda-e-gul ki qasam girya-e-shabnam ki qasam
mausam-e-gul mein bhi hain be-sar-o-saman kitne

mauj-dar-mauj talatum hai khuda khair kare
ek safina ke liye utthe hain tufan kitne

dard-e-dil dard-e-jigar subh-e-alam sham-e-firaq
ek afsane se paida hue unwan kitne

muskura kar kahin tum ne mujhe dekha to nahin
rah gae dil mein tadapte hue arman kitne

mai-kada mein nazar aae jo mujhe pahle-pahal
shaikh sahab hue hairan-o-pareshan kitne

tu ne aaj ai nigah-e-shauq ye dekha hi nahin
un ki palkon pe sitare se hain raqsan kitne

jada-e-dard-e-mohabbat mein bhatak kar ai dost
ek tere nam pe hain dast-o-gareban kitne

mujh se sikhe koi sajdon ka saliqa 'sajid'
ho gae naqsh-e-qadam un ke numayan kitne