fikr-e-naqqad-e-adab dirham-o-dinar mein hai
kaun si jins-e-sukhan kucha-o-bazar mein hai

garmi-e-husn meri garmi-e-afkar mein hai
wo agar mujh mein nahin hai mere ashaar mein hai

pa-ba-zanjir mujhe lakh zamana samjhe
mere qadmon ki dhamak waqt ki raftar mein hai

raat qabu mein rahe shahr ke haalat magar
lash ek lipti hui subh ke akhbar mein hai

koi aawara sa jhonka koi baghi sa khayal
jis se main khauf-zada hun mere ashaar mein hai

kal isi ghar mein ghazal us ne sunai hogi
jaani-pahchani si khushbu dar-o-diwar mein hai

sahil-e-maslahat-e-waqt mujhe jaane de
us safine ne pukara hai jo majdhaar mein hai

wo mohabbat ka mujahid wo murawwat ka shahid
kal ka 'saulat' abhi zinda mere afkar mein hai