fitna-khu le gai dil chhin ke jhat-pat hum se
aur phir samne aane mein hai ghunghat hum se

aap ka qasd mohabbat hai agar ghairon se
qarz le lijiye thodi si mohabbat hum se

so gae hum to ham-aghosh hue khwab mein wo
ab to karne lage kuchh kuchh wo lagawat hum se

ek bose ki talab mein hui mehnat barbaad
wasl ki raat hui yar se khatpat hum se

sulh kar len tere khanjar ke gale mil jaen
qatl ke waqt na rakhiye wo rukawat hum se

hae kis naz se kahte hain shab-e-wasl mein wo
ho chuki baat jo honi thi pare hat hum se