galiyon mein lahu-rezi ka kuchh hal nikal aae
log is liye khud jaanib-e-maqtal nikal aae

main kasa-ba-daston ke qabile ka hun lekin
khush-qismati se hath mere shal nikal aae

rone se mujhe khalq-e-khuda rok rahi thi
phir meri taraf-dari mein baadal nikal aae

ek sath-e-mohabbat pe khada soch raha hun
aisa na ho ye jhil bhi daldal nikal aae

afsos ki ab bhi hain tere dam mein kuchh kuchh
hum samjhe the is bar mukammal nikal aae

aabaad rahe shahr-e-khamoshan kise malum
mujh aisa musafir yahan kis pal nikal aae