gar be-naqab aariz-e-taban kare koi
iman ko kufr kufr ko iman kare koi

bijli ki ye chamak ye papihon ki pi kahan
uf kis tarah basar shab-e-hijran kare koi

qatre ko maut aai jo dariya se mil gaya
ab kya kisi ke ishq ka arman kare koi

hum khak mein mile to mile lekin ai 'wafa'
kya faeda ki un ko pasheman kare koi

ashkon ne ghar ko ghairat-e-sahra bana diya
ab kyon junun mein azm-e-bayaban kare koi

uthte hue shabab ki angdai al-aman
kyon ab na chaak-chaak gareban kare koi

pahlu mein jalwa-gar hai wo kafir-ada 'wali'
kis tarah zabt shorish-e-pinhan kare koi