gar main un se mila nahin hota
ishq ka saneha nahin hota

roz hote hain hadse lekin
jaane kyun wo mera nahin hota

bad-guman mujh se kar gaya koi
warna wo yun khafa nahin hota

soz hum ko mile magar daim
gahe-gahe bika nahin hota

chahaten hain ki jo badalti hain
ishq to barha nahin hota

jaane kaise wafa-parast hain wo
jin se wada wafa nahin hota

ek teri did kharij az imkan
warna duniya mein kya nahin hota

jab se dekha hai ru-ba-ru un ko
hath dil se juda nahin hota

kaun kahta hai ishq mein 'gauhar'
ranj rahat-faza nahin hota