garche zahir mein hain ahwal munawwar sare
raqs karte hain andhere mere andar sare

mauja-e-dard bana dega unhen misl-e-saba
wo jo phirte hain yahan surat-e-sarsar sare

dagh-e-dil mere farozan hain zamin par aise
chhupte phirte hain falak par mah-o-akhtar sare

mere dariya-e-sukhan se hai ilaqa kaisa
wo to payab nadi ke hain shanawar sare

tishnagi zagh ne apni to bujha li pal mein
haif gagar mein pade rah gae kankar sare

kaun banta hai safina yahan kis ki khatir
yun to maujud hain dariya mein shanawar sare

rah-rau aur bhi duniya mein hain 'arshad' lekin
meri hi rah mein padte hain samundar sare