ghair ke aage ye sar kham dekhiye kab tak rahe
be-hisi ka ab ye aalam dekhiye kab tak rahe

dost aur dushman ke chehre ta-ba-kai wazeh na hon
dip ki lau itni maddham dekhiye kab tak rahe

kab duaen mustajab hon kab hamare din phiren
dil pareshan aankh pur-nam dekhiye kab tak rahe

raushni ke jashn mein hael na the shab ke rafiq
chand tare aur shabnam dekhiye kab tak rahe

jo muharrik hai mere takhliq-e-fan ke waste
fikr mein ye shiddat-e-gham dekhiye kab tak rahe

kaise kaise sar-kashida jhuk gae ek war se
han magar sina-sipar hum dekhiye kab tak rahe

barf bhi pighlegi aur suraj bhi chamkega zarur
sard-mehri ka ye mausam dekhiye kab tak rahe