ghair ke sath kabhi zikr hamara na karen
hum ko bad-nam karen ishq ko ruswa na karen

dil ye kahta hai muqaddar hai pareshan rahna
aql kahti hai ki hum zulf ka sauda na karen

kya zarurat hai bala un ki sanware gesu
ek nazar dekh len jis ko use diwana karen

kya nahin jaante hum rang-e-talawwun un ka
mehrban paen bhi to arz-e-tamanna na karen

'bekhud'-e-zar ko ab dekh ke jhuk jati hain
wo nigahen jo kabhi pas kisi ka na karen