gham-e-firaq mein jaan lab pe aai hai sahab
yahi to saat-e-mushkil-kushai hai sahab

sitam jo dhate ho aashiq pe tum ko kaun kahe
tumhaare sath to sari khudai hai sahab

bayan-e-sadma-e-furqat se dam nikalta hai
na puchhiye jo musibat uthai hai sahab

hazar chaha pe khanjar na chal saka tum se
rag-e-gulu bhi meri rang lai hai sahab

'zafar' se aap ko shikwa ajib baat hai ye
raqib ki ye lagai-bujhai hai sahab