gham-e-ishq mein nahin jo kisi nam tak na pahonche
nahin yaad nam wo bhi jo salam tak na pahonche

wo salam hi nahin hai jo payam tak na pahonche
wo payam hi nahin hai jo kalam tak na pahonche

wo kalam hi nahin hai jo tamam tak na pahonche
wo tamam hi nahin hai jo dawam tak na pahonche

wo dawam hi nahin hai jo mudam tak na pahonche
wo mudam hi nahin jo tere nam tak na pahonche

ye khuda hi jaane waiz ki hui namaz puri
rahe mahw-e-sajda yun hum ki salam tak na pahonche

wahi dil hai jo na chahe sar-e-baam husn aae
hai wahi nazar jo uth kar lab-e-baam tak na pahonche

tujhe sahl tha ye saqi koi jam hum tak aata
hamein kuchh to hogi mushkil tere jam tak na pahonche

wo tumhaari rah thahri na lage suragh jis ka
ye hai rasta hamara jo maqam tak na pahonche

tere naqsh-e-pa pe chalna na hua kabhi mayassar
hamin apni kaj-rawi se pa-e-gam tak na pahonche

ye kamal-e-be-khudi hai ki natija-e-khudi hai
tujhe dhundte rahe yun ki maqam tak na pahonche

main wo rind hun ki saqi teri bakhshishon ke chhinte
mere zauq-o-shauq-e-durd-e-tah-e-jam tak na pahonche

yahi aashiyan qafas hai hamein is ki kya khushi hai
ki hum apni be-pari se kabhi dam tak na pahonche

mera nama-e-mohabbat na padha unhon ne pura
mujhe rah gai ye hasrat mere nam tak na pahonche