gham ki aaghosh mein jo palte hain
wahi duniya ka rukh badalte hain

khar to kya hain hum gulon se bhi
apna daman bacha ke chalte hain

inhi khamosh si fazaon mein
kitne tufan hain jo palte hain

lakh kante bichhe hon rahon mein
chalne wale zarur chalte hain

manzilen chumti hain un ke qadam
aap jo apni rah chalte hain

hain wahi asl mein zamana-shanas
jo zamane ke sath chalte hain

un ko milti hai zindagi-e-dawam
thokaren kha ke jo sanbhalte hain

shoabde dekh chashm-e-saqi ke
mai chhalakti hai jam chalte hain

khauf se rahzanon ke ai 'jauhar'
hum kahin rasta badalte hain