gham se nibah kar ke jiye ja raha hun main
khud ko tabah kar ke jiye ja raha hun main

rah-e-wafa mein apni luta kar mata-e-zist
bas aah aah kar ke jiye ja raha hun main

mujh ko kahin farishta na baithen samajh ye log
qasdan gunah kar ke jiye ja raha hun main

aangan tera chamakta damakta rahe sada
jiwan siyah kar ke jiye ja raha hun main

zar zan zamin khushiyan han shohrat sukun bhi
in sab ki chah kar ke jiye ja raha hun main

'shaim' wafa ka badla mujhe to nahin mila
duniya gawah kar ke jiye ja raha hun main