ghamon ki dhup kadi dopahar se guzre hain
tamam umr jhulasti dagar se guzre hain

hamari palkon se tapke na kyun giran-khwabi
faraaz-e-shab se tulu-e-sahar se guzre hain

ajib baat hai ghar ka nishan nahin milta
hazar bar unhi diwar-o-dar se guzre hain

kabhi sukun hai kabhi iztirab ka aalam
ajib kaifiyat-e-khair-o-shar se guzre hain

bharosa kaun kare ab sada-e-sahra ka
misal-e-gard isi rahguzar se guzre hain