ghar ata kar makan se kya hasil
sirf wahm-o-guman se kya hasil

be-yaqini hi be-yaqini hai
is zamin-o-zaman se kya hasil

soch aage badhe to baat bane
sirf umr-e-rawan se kya hasil

dil bhi aasuda chahiye warna
daulat-e-be-karan se kya hasil

ek chehra hai kaenat meri
surat-e-digaran se kya hasil

jab khushi ruh ki na sath rahi
rahat-e-jism-o-jaan se kya hasil

dil mein jab jins-e-arzu hi nahin
sirf khali dukan se kya hasil

apne aamal ko bhi badlo 'adil'
sirf aah-o-fughan se kya hasil