ghubar dil mein bhara kirkiri salam-alaik
hai kis ke kaam ki ye zahiri salam-alaik

karen na sidhi nigah dusri salam-alaik
hai ab ke yaron ki ye jharjhari salam-alaik

talawwun aisa in abna-e-rozgar mein hai
ki subh miliye to hai charpari salam-alaik

mabaada baat mein bu-e-tama agar pawen
phir un ki aankhon se teri giri salam-alaik

jo sham dekho to phir in tilon mein tel nahin
churai aankhen hain bhauwen phiri salam-alaik

ba-qaul-e-shaer-e-bangala 'azfari' yun rah
ki khana ganth ka in se niri salam-alaik