ghubar-e-rah-e-wafa aasman sa lagta hai
har ek zarra yahan kahkashan sa lagta hai

ye fasla mujhe jaane kahan pe le jae
wo fasla jo tere darmiyan sa lagta hai

mere badon ki duaon ka ye karishma hai
ki sar pe mujh ko sada saeban sa lagta hai

nai udan ne yun dur kar diya ghar se
ki aasman mujhe apna makan sa lagta hai

yaqin jaaniye hum dil-jalon ki baaton se
kabhi dhuan nahin uthta dhuan sa lagta hai

mere makan mein bhi khilte hain rang rang ke phul
mera makan bhi hindostan sa lagta hai

'said' mujh ko to ab zindagi ka har lamha
yaqin sa hote hue bhi guman sa lagta hai