ghuncha-o-gul ko sukha sukha main bhi dekhun tu bhi dekh
nazm-e-gulistan badla badla main bhi dekhun tu bhi dekh

kaun hai kitne pani mein ye raaz abhi khul jaega
ghar se nikal kar tanha tanha main bhi dekhun tu bhi dekh

bikhri hui har samt chaman mein kis ke badan ki khushbu hai
gosha gosha mahka mahka main bhi dekhun tu bhi dekh

nazr-e-talatum ho gai shayad kashti-e-dil ye kahti hai
josh-e-talatum thanda thanda main bhi dekhun tu bhi dekh

baam pe apne jalwa-fagan hain be-parda wo shayad aaj
chand ko 'qasid' phika phika main bhi dekhun tu bhi dekh