ghunchon ke tabassum par hum ghaur nahin karte
khamosh takallum par hum ghaur nahin karte

dube ki rahe kashti dariya-e-mohabbat mein
tufan o talatum par hum ghaur nahin karte

kaliyon ke tabassum ki taqlid to karte hain
anjam-e-tabassum par hum ghaur nahin karte

un ke rukh-e-taban ki dekhi hai jhalak jab se
mehr o mah o anjum par hum ghaur nahin karte

gham ho ki khushi donon yaksan hain mohabbat mein
kuchh ashk o tabassum par hum ghaur nahin karte

jab tak ki mohabbat mein dil dil se nahin milta
nazron ke tasadum par hum ghaur nahin karte

ashaar-nawazi hi shewa hai 'nasim' apna
shair ke tarannum par hum ghaur nahin karte