gul-e-rangin mah-e-kaamil kahan hai
mujhe aawaz de ai dil kahan hai

hai khud gumrah aql-e-maslahat mein
junun se puchhiye manzil kahan hai

har ek shai is muhit-e-zindagi mein
fareb-e-mauj hai sahil kahan hai

na ithla ai nasim-e-subh-gahi
khuda jaane mera ab dil kahan hai

dar-e-mazi jabin-e-haal kab tak
bata ai mere mustaqbil kahan hai

na malum ai sukun-e-kaamrani
wo lutf-e-sai-e-la-hasil kahan hai

bahaar aaegi ashk-e-sada-ru par
abhi khun-e-jigar shamil kahan hai

wo dil jis ko mayassar hai huzuri
asir-e-bazm-e-ab-o-gil kahan hai

jise samjha hai 'faiz' aaina-e-haq
wo be-aks-e-rukh-e-baatil kahan hai