gul o mahtab likhna chahta hun
main apne khwab likhna chahta hun

mohabbat se bhara hai dil ka dariya
magar payab likhna chahta hun

likhun kaise ki sare sher tum par
bahut nayab likhna chahta hun

main apna aur tumhaara nam ek din
kanar-e-ab likhna chahta hun

main khud ko baadshah-e-ishq likh kar
tumhein be-tab likhna chahta hun

main sare zakhm jo tum se mile hain
unhen shadab likhna chahta hun

main 'sabir' zindagi ke sare manzar
pas-e-girdab likhna chahta hun