guzar chali hai shab-e-dil-figar aakhiri bar
bichhadne wale hain yaron se yar aakhiri bar

damak raha hai sahar ki jabin pe bosa-e-shab
thapak rahi hai saba ru-e-yar aakhiri bar

zara si der ko hai pattiyon pe shisha-e-nam
guzar rahi hai kiran aar-par aakhiri bar

ye baat khemon ke jalte diye bhi jaante the
ki hum ko bujhna hai tartib-war aakhiri bar

kisi alaw ka shoala bhadak ke bolta hai
safar kathin hai magar ek bar aakhiri bar

sumon se udti hui reg-e-dasht dhundhti hai
ghubar hote hue shahsawar aakhiri bar