guzarna hai ji se guzar jaiye
liye dida-e-tar kidhar jaiye

khule dil se milta nahin ab koi
use bhulne kis ke ghar jaiye

subuk-rau hai mauj-e-gham-e-dil abhi
abhi waqt hai par utar jaiye

ulat to diya parda-e-shab magar
nahin sujhta ab kidhar jaiye

ilaj-e-gham-e-dil na sahra na ghar
wahi hu ka aalam jidhar jaiye

isi mod par hum hue the juda
mile hain to dam bhar thahar jaiye

kathin hain bahut hijr ke marhale
taqaza hai hans kar guzar jaiye

ab us dar ki 'akhtar' hawa aur hai
liye apne sham-o-sahar jaiye