guzishta waqt ki har baat aani jaani hui ye baat agle safar ki nai nishani hui laga ke baith gae shart dast-o-bazu ki agarche dil mein hai pahle se haar mani hui juda kiya hai use aap hi to chup kyon ho bhala ye kaun se jazbe ki tarjumani hui use phir aur kisi sher mein kaha na gaya jo baat aap se pichhle dinon zabani hui sunae jaen agar koi sunne wala ho kisi ki yaad hamare liye kahani hui badal gaya hai chalan shahr-e-arzu ka 'nasim' is ahd-e-nau mein tumhaari wafa purani hui