guzre hain hum pe aise bhi lamhe kabhi kabhi
dil ro pada hai sun ke latife kabhi kabhi

sahra se tishnagi ka sabab puchhte ho kya
dariya bhi hum ne dekhe hain pyase kabhi kabhi

gum-karda rah-e-zist sahi is ke bawajud
puchhe hain hum se khizr ne raste kabhi kabhi

ai na-khuda-e-waqt na itna ghurur kar
dube hain sahilon pe safine kabhi kabhi

har dil ko aap aaina-khana na jaaniye
patthar se sakht hote hain shishe kabhi kabhi

'sumbul' hua hai ye bhi ki ghazlon ke rup mein
nazil hue hain hum pe sahife kabhi kabhi