guzro na is tarah ki tamasha nahin hun main
samjho ki ab hun aur dobara nahin hun main

ek taba rang rang thi so nazr-e-gul hui
ab ye ki apne sath bhi rahta nahin hun main

tum ne bhi mere sath uthae hain dukh bahut
khush hun ki rah-e-shauq mein tanha nahin hun main

pichhe na bhag waqt ki ai na-shanas dhup
sayon ke darmiyan hun saya nahin hun main

jo kuchh bhi hun main apni hi surat mein hun 'alim'
'ghaalib' nahin hun 'mir'-o-'yagana' nahin hun main