guzrunga main jidhar se baqa chhod jaunga
be-harf kar ke lafz-e-fana chhod jaunga

daur-e-khizan mein khar bhi mahkenge misl-e-gul
main gulsitan mein aisi faza chhod jaunga

tum lafz lafz karna tilawat meri hayat
main iqtibas-e-azm khula chhod jaunga

jis par hazar mai-kade ho jaen khud nisar
aankhon mein teri aisa nasha chhod jaunga

'amir' sila mile na mile pyar ka mujhe
lekin labon pe dad-e-wafa chhod jaunga