haal-e-dil kis-kis se hum sajha karen
aur kitne dar pe ab sajda karen

ghup andhera hai to phir aisa karen
apni palken aap hi kuchh wa karen

dusron ka kuchh bhala ho jaega
aaiye apne liye achchha karen

be-sar-o-pa hai hujum-e-khwahishat
ek ho to aap se shikwa karen

ta-ba-kai ho sha'iri mein zikr-e-yar
koi gar naraaz ho to kya karen

samne ho tum mujassam aaina
khud ko dekhen ya tumhein dekha karen

kar chuke jo 'nazr' karne the gunah
waqt-e-akhir hasrat-e-‘uqba karen