haal puchha to hans ke tal diya
us ne ek imtihan mein dal diya

zakhm duniya ne jis qadar bhi diye
us ne zakhmon ko indimal diya

kis liye ab hawa ka rukh dekhen
naw ko jab nadi mein dal diya

nisbat-e-rahbar bhi kya shai hai
girte girte hamein sanbhaal diya

barha dubte safinon ko
mauj-e-tufan ne khud uchhaal diya

raushni bakhsh di sitaron ko
us ne suraj ko gar zawal diya

jo mila be-talab mila us se
jo diya us ne be-misal diya

us ko dushman kahun ki dost 'nasim'
jis ne mazi ko le ke haal diya