haar kar bazi phir ek tadbir ho jaunga main
tum samajhte ho yun hi taskhir ho jaunga main

ishq mein is ke sawa main kuchh nahin kar paunga
hu-ba-hu jaanan teri taswir ho jaunga main

sath chhutega nahin apna safar mein umr ke
rahguzar tu aur tera rah-gir ho jaunga main

aayaten mansub hain tujh se rumuz-e-ishq ki
aur inhi aayat ki tafsir ho jaunga main

gham uthata hun ghazal kahta hun jita rahta hun
log kahte hain ki ek din 'mir' ho jaunga main