hadse zer-o-bam pech-o-kham rah dekh
gah chal gah ruk gah mud gah dekh

tul-e-fihrist-e-hajat kuchh rahm kar
meri mushkil samajh meri tankhwah dekh

buz-dilon ki tarah chhup ke hamla na kar
apne dushman ko bhi kar ke aagah dekh

jis ko aana na ho wo nahin aaega
ek do din nahin chaar chhe mah dekh

apni auqat ka jaeza le zara
us ki zebaish-o-mansab-o-jah dekh

kuchh tamiz uyub-e-mahasin nahin
hai nazar teri kis darja kotah dekh