hai kaun kis ki zat ke andar likhenge hum
nahr-e-rawan ko pyas ka manzar likhenge hum

ye sara shahr aala-e-hikmat likhe use
khanjar agar hai koi to khanjar likhenge hum

ab tum sipas-nama-e-shamshir likh chuke
ab dastan-e-lasha-e-be-sar likhenge hum

rakkhi hui hai donon ki buniyaad ret par
sahra-e-be-karan ko samundar likhenge hum

is shahr-e-be-charagh ki aandhi na ho udas
tujh ko hawa-e-kucha-e-dil-bar likhenge hum

kya husn un labon mein jo pyase nahin rahe
sukhe hue labon ko gul-e-tar likhenge hum

hum se gunahgar bhi us ne nibha liye
jannat se yun zamin ko behtar likhenge hum