hai muamma meri mohabbat bhi
shukr ke sath hai shikayat bhi

dil ko pyari hai jis ki nafrat bhi
kya ho gar wo kare mohabbat bhi

dushman-e-e'tibar hoti hai
baz haalat mein haqiqat bhi

isi mamure mein bana li hai
sada-lauhon ne apni jannat bhi

is mohabbat pe naz kya kije
ho mili jis mein kuchh murawwat bhi

aag dil ki kisi tarah na bujhi
pi ke dekhi mai-e-mohabbat bhi

tere kuche mein jaen kis munh se
kho chuke hum teri amanat bhi

ho basarat se kya umid 'raza'
dhoke deti hai jab basirat bhi