hain muddaton se dekhne walon ke muntazir
ehsas-e-be-panah ki jagir aur hum

koshish na kaam aaegi ye kis ne kah diya
baithe bithae man len taqdir aur hum

mumkin kahan koi nazar-andaz kar sake
baham rahe hain shahr ki tauqir aur hum

jaenge ek roz samundar ki god mein
dariya ke sath ret ki tahrir aur hum

fursat kahan ki aur kahin dekhiye 'fahim'
har sans apni khak ki tamir aur hum