hain muntazir aankhen koi ek khwab to aae
sahil nahin aata hai to girdab to aae

sahra ke khad-o-khal se khelun main kahan tak
raste mein koi khitta-e-shadab to aae

kya fikr jo paikar se wo mahtab nahin hai
pahne hue pairahan-e-mahtab to aae

aflak ye kahte hain hui bazm mukammal
kahte hain sitare mera mahtab to aae

jo waqt ki likkhi hui tahrir mita de
bazar mein aisa koi tezab to aae

jin logon ne dekhi nahin dubi hui basti
wo log dua karte hain sailab to aae

sunta hun ki har shakhs padhe us ka qasida
ek bar shanawar wo tah-e-ab to aae

aa jaenge aahu bhi jhukae hue gardan
shamshir-e-hunar mein teri kuchh aab to aae

kis kaam ke the phenk diye dasht-e-ziyan mein
hathon mein kai gauhar-e-nayab to aae

sukhe hue hont apne dikha denge use hum
pahle hamein karne koi sairab to aae

har shakhs se milta hai nae kunj-e-nafas mein
'yawar' ko mulaqat ke aadab to aae