hain nadan jo bhi insan un ki nadani nahin jati
wo ladte rahte hain aur khu-e-haiwani nahin jati

salaf ne jo banae the wo aiwan mit nahin sakte
khade hain sar uthae shan-e-aiwani nahin jati

jahan mein nek khaslat nek niyyat jo bhi hote hain
jawani mein bhi un ki pak-damani nahin jati

sitaron se faza shab ko munawwar hoti rahti hai
magar un mein jo poshida hai virani nahin jati

takhayyul mein tasawwur mein wo mere pas hote hain
nigahon se zara un ki nigahbani nahin jati

zamane mein hamara khun bahut arzan hai ai 'basir'
kisi surat hamare khun ki arzani nahin jati