hairan ho raha hun basirat ke nam par
main dekhta kuchh aur hun manzar kuchh aur hai

mujh ko sitara aur koi khinchta hai kyun
mera ilaqa aur hai mehwar kuchh aur hai

patthar samajh raha hai zamana to kya karun
mutthi mein meri jab ki munawwar kuchh aur hai

tasir-e-khak aaegi alfaz mein mere
dil mein hai aur baat labon par kuchh aur hai

'alam' mujhe bharosa nahin zaichon pe ab
is mein likha tha aur mayassar kuchh aur hai