hairan hun ki ye kaun sa dastur-e-wafa hai
tu misl-e-rag-e-jaan hai to kyun mujh se juda hai

tu ahl-e-nazar hai to nahin tujh ko khabar kyun
pahlu mein tere koi zamane se khada hai

likha hai mera nam samundar pe hawa ne
aur donon ki fitrat mein sukun hai na wafa hai

shikwa nahin mujh ko ki hun mahrum-e-tamanna
gham hai to faqat itna ki tu dekh raha hai

main shahr-o-bayaban mein tujhe dhund chuka hun
be-dard to kis hujla-e-pinhan mein chhupa hai

uthti hain jo pahlu se mere dard ki lahren
betab samundar koi sine mein daba hai

ai zist ke dozakh se guzarte hue lamho
socha hai kabhi tum ne ki jina bhi saza hai

hum rakhte hain dawa ki hai qabu hamein dil par
tu samne aa jae to ye baat juda hai

khush-bakht to wo hai jise tu apna samajh le
kahne ke liye yun to hamara bhi khuda hai

main dozakh-e-jaan mein bhi raha mahw-e-tag-o-taz
yun kahne ko is umr ka har lamha naya hai

har mauj-e-hawa tez faza ta-ba-ufuq tang
dil zarra-e-sahra hai bagulon mein ghira hai

ai dasht-e-tamanna mein bhatakte hue aahu
tu kaun hai kis waqt ki rah dekh raha hai

kyun jage hue shahr mein tanha hai har ek shakhs
ye raushni kaisi hai ki saya bhi juda hai

kis dast-e-hina-basta ka zewar hai wo khanjar
gham ban ke jo har shakhs ke sine mein gada hai

thahrae use 'arsh' koi kaise jafa-kash
jo mujh se alag rah ke bhi hamrah chala hai