halqa-e-digaran mein shamil tum
kucha-e-qatilan mein shamil tum

bazm-e-ahbab mein ho tum lekin
ho saf-e-dushmanan mein shamil tum

har nafas ham-kalam hun tum se
mere harf-o-bayan mein shamil tum

har ghadi ehtisab hai mera
mere sud-o-ziyan mein shamil tum

main tumhaare wajud ka hissa
paikar-e-jism-o-jaan mein shamil tum

roz-e-mahshar guzar gaya mujh par
lamha-e-imtihan mein shamil tum