hamara masala hal ho raha hai
ki ab ye shahr jangal ho raha hai

kisi ne apni naw kya utari
ye dariya jaise pagal ho raha hai

musalsal ruh zakhmi ho rahi hai
badan mismar pal pal ho raha hai

main shiddat dhup ki jab sah chuka hun
koi aise hi baadal ho raha hai

in aankhon ki adam-e-dilchaspiyon se
hamara khwab bojhal ho raha hai

meri sanson ka jaane kya banega
tera aana moattal ho raha hai

jahan ke aakhiri hisse mein hun ab
safar-nama mukammal ho raha hai