hamare pas aane par haya se kaam leti ho
magar tanhai mein aksar hamara nam leti ho

sar-e-mahfil to koi guftugu karti nahin ho tum
nigahon se mere dil ke magar paigham leti ho

mere pine se nafrat kyon hai tum ko ye to batlao
surahi tod deti ho kabhi tum jam leti ho

sunati ho meri chahat ke qisse tum saheli ko
khushi se jhum ke apna hi daman tham leti ho

tumhaare dil ki dhadkan mein base jo pyar ke naghme
hamara nam un naghmon mein subh-o-sham leti ho

gawara kar nahin saktin agarche ruth ke jaana
to phir kyon be-rukhi ka apne sar ilzam leti ho

mujhe malum hai tum 'ashna' ho meri chahat se
ada-e-be-rukhi se bhi magar tum kaam leti ho