hamare qalb ke aangan mein tu nahin rahta
sarab-e-husn teri justuju nahin rahta

kuchh aisa zakhm diya irtiqai suraj ne
ragon mein daudne wala lahu nahin rahta

ye tajrabaat ka mausam ajib mausam hai
kahin bhi shakh-e-shajar par numu nahin rahta

na jaane kaun si wahshat hai us ki aankhon mein
wo aaina hai magar ru-ba-ru nahin rahta

garaj ke sath barasna ghata ki fitrat hai
samundaron mein kabhi hao-hu nahin rahta

wo ajnabi tha sar-e-rah lut gaya 'nashtar'
charagh-e-rah-e-safar ku-ba-ku nahin rahta