hamare shahr mein ghar is liye sunsan rahte hain
ki ghar ghar khauf se sahme hue insan rahte hain

agar tum ishq ki masjid mein jaana than hi baithe
to bar-khurdar sikho us ke kya arkan rahte hain

mujhe malik mere bachchon ke har gham se bacha lena
lab-e-dil par wahi ban kar mere muskan rahte hain

mujhe koi dikha kar khwab mein mera nagar bola
yahan la-haul wird-e-khas rakh shaitan rahte hain

mohabbat wo muqaddas chiz hai sun ai dil-e-nadan
wo mil jae to rahat ke bade imkan rahte hain

wahi dil mo'atabar mufti hai ahl-e-din ki duniya mein
ki jis mein ai zamane muttaqi arman rahte hain

meri basti pe hargiz qahr barpa ho nahin sakta
meri basti mein ghar ghar sahib-e-iman rahte hain

miyan shohrat bhi aksar aadmi pe zulm dhati hai
wahi achchhe hain duniya mein jo kam pahchan rahte hain

yahan har baat aankhon ke ishaare se karo 'tahir'
lage diwar se har waqt kitne kan rahte hain