hamare zauq par ye waqt agar aaya to kya hoga
nazar mein jazb ho kar wo nazar aaya to kya hoga

gham-e-hasti ka tara auj par aaya to kya hoga
hansi mein bhi koi aansu ubhar aaya to kya hoga

udhar tare idhar kaliyan hain masruf-e-giran-khwabi
agar aise mein paigham-e-sahar aaya to kya hoga

ye khali jam rakkhenge bharam kab tak tera saqi
jo maikhane mein koi dida-war aaya to kya hoga

tumhaara gham gham-e-alam ki surkhi ban to sakta hai
koi dhabba agar tarikh par aaya to kya hoga

chale to hain talash-e-astan mein ai 'shifa' hum bhi
magar apna hi pahle sang-e-dar aaya to kya hoga